ASTURIES LLIBERTARIA: Cándido y Morala, analís de daqué más qu'un conflictu

ALB Noticias

Los fechos

El 10 de Marzu de 2005 los trabayaores de Naval Xixón tres un añu ensin carga de trabayu y cola sombra del pieslle empresarial sobrevolando la bahía xixonesa dende cuantayá, deciden n’asamblea llevar a cabu les movilizaciones una vegada más en protesta por esta situación. Naturalmente nun yeren les primeres movilizaciones, Naval Xixón ye una empresa con una conflictividá importante ya dende qu’entamó la mal llamada reconversión industrial nos 80 y esa llucha llega fasta güei.

Neses movilizaciones sofitáes por tolos trabayaores, dalgunos d’ellos quemen el caxetín de conesiones d’una cámara pal control del tráficu [1], la cual rialmente fuera asitiada ehí pa controlar les movilizaciones de los trabayaores de la naval tanto dientru como fuera del astilleru. Al día siguiente un funcionariu en representación del Ayuntamientu de Xixón (PSOE e IU-BA) presenta una denuncia por dichos fechos.

La policía fina señalando como culpables a dos trabayaores: Cándido González Carnero y Juan Manuel Martínez Morala.

Nel xuiciu cellebráu el 30 de Xineru de 2007 la única preba presentá ye la pallabra de dellos policíes, los cuales contradícense de siguíu. Mientres tantu rechácense les prebes presentaes pola defensa y dalgunos de los sos testigos ensin nenguna razón. Por si fuera pocu un de los policías, el cual declaró nun conocer a los denunciaos, ye identificáu polos sindicalistes como un infiltráu nel so sindicatu, CSI, ya incluso llegó a acompañalos a Barcelona a les movilizaciones anti-globalización del añu 2002 onde se dedicó a frayar llunes y cabines de teléfonos.

A la salida del xuiciu Cándido y Morala, ente les más de 2000 persones que foron a sofitales esi Martes pela mañana, lu describen como “un linchamientu” [2]

Pero pa atalantar too esto fae falta daqué. ¿Por qué s’acusa ensin pruebes a esos dos trabayaores en concretu cuando eses movilizaciones foron decidíes pol comité d’empresa (CSI, UXT, CCOO) y pola asamblea de trabayaores?

La trama política

Esto s’aclara al conocer que Morala ye l’actual Secretariu Xeneral de la Corriente Sindical d’Izquierdes y que Cándido foi el so antecesor, un sindicatu autoxestionáu y ensin lliberaos a diferencia de CC.OO. y UXT, éstos más interesaos en recibir perres por cursos de formación que na llucha sindical.

Lóxicamente esto nun ye casualidá. Trátase del puntu culmen d’una campaña represiva llevada a cabu pol Delegáu del Gobiernu Español n’Asturies, Antonio Trevín Lombán, qu’entama más o menos cola concentración antifacista cellebrada en Cangues d’Onís nel añu 2005 na que la policía actuó escontra los ellí reuníos con una brutalidá increíble obligando a escondese nel monte a decenes de persones. A los pocos díes tuvo llugar la detención de Fernando G. R a quien se-y aplicó la llei antiterrorista. Tres esto desencadenose una braera ofensiva escontra los movimientos sociales y políticos onde por mencionar dalgunos fechos nos atopamos con una paliza de los antidisturbios a los fuelguistes del hospital d’Uviéu, infiltraciones constantes de la Brigada de Información, la violencia de la Guardia Civil en retruca a la acampada escontra l’embalse de Caliau, delles multes de miles d’euros por pintaes…y en xeneral un clima de represión y afogamientu de los movimientos sociales y políticos, poniendo denuncies a tropel cuntando cola sola pallabra de la policía. Ente esta situación ñaz a propuesta de la CSI la “Plataforma poles llibertaes y escontra la represión” que nagua por inxertar el casu de Cándido y Morala nesti contestu.

La especulación urbanística y la desindustrialización

Y por último vamos inxertar la pieza que falta pa completar el puzzle: la especulación urbanística. L’astilleru Naval Xixón ta asitiáu na bahía de la ciudá, nuna zona mui xugosa pa les constructores. Dende fae años la especulación ta xintándose los astilleros que perdieron la metá del so terrenu, siendo esti ocupáu en gran parte por edificios de lluxu . Esti urbanismu feroz ye promovíu pol PXOU de la ciudá, el plan que decide qué, dónde y cómo se construye, realizáu pol Ayuntamientu (recordemos, PSOE-IX). Si siguimos tirando del filu topámonos con que esos edificios de luxu foron construyíos por una filial d’una empresa nomada PROGEA, constructora lligada al Partíu Comunista d’España

Les intenciones tan clares. Recalificar los 300.000 metros que queden del Astilleru y construir viviendes de luxu, dexando la zona como un área residencial asitiada a pocos metros del mar. Un braeru pelotazu.

Esta especulación urbanística ye daqué que surde n’Asturies nos caberos años, con tantu enfotu como la emigración de la mocedá asturiana pola falta de trabayu, que se cuenta por miles. Asturies ta convirtiéndose, o más bien, tán conviertiéndola, nuna zona turística, residencial, onde la industria ye la escaecida de la hestoria. Seutor tres seutor van cayendo toos: minería, agricultura, metalurgia… agora toca finar col naval, el cual ya taba mui murníu. L’oxetivu ye pasar de ser una zona altamente productiva a una zona dafechamente consumidora que viva, o sobreviva, del seutor servicios. La terciarización ta siendo imparable, y con ella ta llegando a la más absoluta precariedá y el fin de les lluches obreres.

Aislamientu mediáticu, desmovilización y el supuestu fin del conflictu

El primer pasu cuando hai un conflictu como l’actual ye informar a la ciudadanía pa fomentar la solidaridá y tener una bas social pa pasar a la movilización. N’Asturies y sobre too en Xixón el PSOE tien práuticamente el monopoliu de los medios de comunicación, polo que cuando esti partíu y los sos afines cometen una inxusticia como la que tamos tratando ye mui difícil comunica-yla a los ciudadanos y asina creyar redes solidaries. Les menciones en prensa, radio y TV foron puxarra, ensin preocupase por investigar la verdá y difundila, y dando por válidu el discursu de PSOE ya IX.

Lo habitual nestos casos suel ser que quienes tienen esi monopoliu usen los medios de comunicación pa criminalizar a los acusaos, d’esta manera priva-yos d’un sofitu social y asina poder actuar a la escontra d’ellos. Pero nun foi asina, Cándido y Morala son dos persones conocíes en Xixón y con un historial de llucha de décades, amás cuntaben col sofitu de muncha xente mediante la “Plataforma poles llibertaes y escontra la represión”, polo qu’esa forma d’actuar nun daría resultáu. Viendo esto optaron per otra vía.

L’Ayuntamientu siempres negó poner la denuncia, incluso comprometiéronse a nun cobrar la multa impuesta a Cándido y Morala (daqué que de momentu incumple). Asina trataben en primer llugar de dar la impresión de que los dos trabayaores de la naval foran denunciaos práuticamente por un error, casi por casualidá. Difundiendo esto algamaron que muncha xente pensase que nin tan siquiera se-yos diba a xulgar, que yera daqué que pasara por error y qu’en too casu yera un toque d’atención. Pero xulgaron-yos.

Enantes de salir la condena la opinión pública, influenciada polos medios de comunicación, taba convencida de que la conderga yera daqué improbable, que aunque se foi too un pocu de les manes finalmente nun pasaría ná. Pero condergaron-yos.

Una vegada conocía la sentencia de 3 años de cárcele les conversaciones sobre’l tema en vez de xirar alreor de les movilizaciones a rializar xiraben alreor del posible recurso. Pero nun hebio recurso y la sentencia foi firme.

Cola sentencia firme les informaciones que salíen, de nueu yeren relatives a que aún quedaba otru recurso, ente’l constitucional esta vegada, y ya que nun son xente peligrosa seguro que taríen en llibertá fasta que saliese esi caberu recurso. Pero encarcelaron-yos.

Tando los dos na cárcele, nos medios de comunicación nun se-y dio mayor importancia, nun se faló de Drechos Humanos, nin de “ruptura del estáu de drechu” como faen con otros temes, si non que s’entamó a falar del indulto. Y asina tanto la ciudadanía en xeneral, como incluso la xente y organizaciones más implicaes nel casu como la Plataforma, en vez de radicalizar les movilizaciones entraron una vegada más nel xuegu.

Finalmente salieron a la cai, en primera instancia motivu del 3er gráu otorgáu poles Instituciones Penitenciaries, aunque díes dempués anulóse la sentencia condenatoria a la espera del recurso nel constitucional ya’l posible indulto.

Visto el resultáu algamáu, ye dicir, la llibertá de Cándido y Morala, munchos pueden pensar qu’esto foi una victoria porque gracies a la presión realizada “sacámoslos de la cárcel”. En parte pue ser, pero el procesu foi más complexu qu’eso.

Quiciábes haiga que plantegase si realmente s’algamó movilizar a la xente o si estuvieron a la vista de les decisiones xudiciales. Quiciábes haiga que falar de la llabor de delles organizaciones que paecíen más interesaes n’esibir les sos sigles y mostrase como alternativa elleutoral que na llucha asamblearia y xunitaria. Quiciábes haiga que revisar el funcionamientu de les organizaciones xunitaries y los sos cauces de participación. Quiciábes haiga qu’analizar si se cumplió esi “hai que dir per etapes” tan repetíu, o si el procesu ta estancáu na mesma etapa dende’l so entamu ensin nengún tipu de escalada.

Y ye que quiciábes l’oxetivu nun yera solo encarcelar a Cándido y Morala ya apaguyar a toos los lluchadores sociales. Quiciábes l’oxetivu yera observar qué consecuencies tendría tratar de meter na cárcel ensin nenguna preba a dos persones conocíes socialmente pola so llucha. Quiciábes Asturies foi una vegada más campu de prebes.

Too esto solo son especulaciones, pero seya como fuere, tomaríen bona nota de lo sucedíu (y de lo non sucedíu).

[1] Vídiu de los fechos grabau pola policía. Morala, con abrigo roxu, en nengún momentu arrimase al famosu caxetín.

[2] Vídiu de Cándido y Morala a la salida del xuiciu.

- Vídiu resumen del conflictu, de SomosGuerrilla.

- Artículu de Xuán Cándano: "Cándido y Morala saltan el muro"