lunes, 3 de agosto de 2009

Onofre García Tirador

Metalúrxicu y anarquista nacíu en La Felguera en 1907, dende bien mozu escomenzó a trabayar en Duro Felguera y pronto atrayeron-y les idees llibertaries. Afilióse a la CNT y entamó a parar pol Centru Obreru Xusticia de La Felfuera. El so interés pola cultura llevo-y a dir a clases nocturnes cuando finaba la so xornada en Duro Felguera.

En Setiembre de 1932 ye nombráu Delegáu del Sindicatu del Metal pal Congresu Rexonal de la CNT. Asinamesmu yera miembru de la Federación Anarquista Ibérica (FAI), destacando como un gran orador, lo que-y llevó a participar en mítines per toa Asturies.

Participante activu na Revolución d’Ochobre de 1934, tres asegurar La Felguera foi cabezaleru d’una columna que marchó hacia Uviéu pa reforzar la revolución na capital. Tres la derrota del movimientu revolucianariu tien que fuxir de la represión, colando hacia Canarias, onde lu detuvieron a fines de 1935, siendo encarceláu na prisión del Coto en Xixón.

Meses dempués en Xunetu de 1936, Onofre llánzase de nuevu a la llucha xunto con miles de milicianos llibertarios pa frenar la sublevación militar reaccionaria. A fines de 1936 ye nombráu Conseyeru de Trabayu nel Conseyu Interprovincial d’Asturies y Llión (dempués Conseyu Soberanu) en representación de la FAI. Forma’l Batallón CNT nº2, tamién conocíu como Batallón “Onofre”, con base en La Villa. Tres la militarización sedría conocíu como Batallón d’Infantería 207.

Cola cayía del Frente Norte y polo tanto d’Asturies, tien que fuxir de nuevu de la represión, embarcando nel Puertu d’El Musel de Xixón abordo’l “Abascal” xunto varios miembros del Conseyu, amás d’oficiales y milicianos. Algamen aportar a la costa francesa pa dempués tornar a zona republicana, a Barcelona.

Cola victoria final de la sublevación reaccionaria pasa a Francia, emigrando dempués a Londres y asitiándose finalmente en México, militando nel movimientu llibertariu nel exiliu. Dempués de la muerte de Franco collabora na reconstrucción de la CNT asturiana, asina como participa nel so órganu d’expresión, Acción Libertaria. Cuando tien llugar la escisión na CNT pocisiónase cola llamada CNT-Renovada (posteriormente CGT).

Tres toa una vida de llucha pol ideal ácrata fina en 1988.

AsturiesLlibertaria

Fontes: Militantes-anarchistes (en francés), SBHAC (castellano), La Vanguardia 29/11/1935 (castellano) y AsturiasRepublicana "Entrevista a Álvarez Palomo" (castellano).

No hay comentarios: