jueves, 19 de marzo de 2009

70 aniversariu Revolución d'Ochobre 1934

Un añu más, como inevitable que resulta, torna Ochobre, y otru añu más, anque esto sí resulte evitable, torna a quedar nel escaezu aquelli Ochobre nel que los nuesos güelos llucharon pola llibertá, escontra'l capitalismu y l'estáu; nun pasó tantu tiempu como pa que seya posible que tantu dolor y valentía seyen escaecíos. Foron 70 años, menos d'una vida, pero abondo pa que los vencedores reescribieran la hestoria y esborriasen lo que resulta peligrosu que se sepia. Nós mos negamos a escaecer el coraxe de los nuesos familiares, de los trabayadores asturianos en xeneral, y apelamos a l'alcordanza de lo que paez que ta prohibío saber.

Corría l'añu 1931, les esperances de la población centrábense na II República, yera considerada polos seutores d'esquierda como l'entamu d'un cambéu muncho más fondu. Dende'l gobiernu paecía que diben tomase midíes que la población necesitaba, entamó a falase d'un cambéu na educación, fasta entós en manes de la Ilesia, d'una reforma agraria que diera a los campesinos una tierra que los terratenientes nun trabayaben, los estatutos d'autonomía... Pero solo foron eso, palabres, l'aplicación de ciertes midíes resultó cuasi insignificante, sobro tou el casu la reforma agraria. La clas trabayadora ardía en ganes de soluciones, de coyer les riendes la so vida, de dexar de tener que caltener a quiénes nun trabayaben pero vivíen meyor qu'ellos.

N'Asturies, naquelli momentu, en 1934, la llucha obrera concentrábase sobro tou nel sindicatu socialista UGT, con unos 40.000 afiliaos, y na anarcosindical CNT, con unos 30.000 afiliaos. Como frutu del entendimientu d'estos dos sindicatos naz l'Alianza Obrera col oxetivu de potenciar la llucha de los trabayadores, y algama dafechu'l so oxetivu, yá que dende la so creyación en Marzu d'esi mesmu añu fasta Ochobre, convoca 6 fuelgues xenerales y más de 20 llocales. Esti espíritu revolucionariu y de xusticia social desemboca na revolución social d'Ochobre de 1934. Cabe mencionar que la incorporación del Partido Comunista ye un tanto ablucante y de cabera hora, yá que na viéspera del españíu revolucionariu calificaba a los anteriores de "Alianza Obrera de la traición", y dos díes dempués, cuando la revolución yá yera un fechu, pidía ingresar na mesma Alianza tres de disculpase poles sos caberes palabres. Ingresó na Alianza Obrera más que pola so fuercia, que comparada colos dos grandes sindicatos nun yera un res, como demostración del pluralismu ideolóxicu de la Alianza. Esti fechu contrasta tamién cola imáxen que traten d'ufiertanos anguaño por parte de dalguna organización d'esquierdes, presentándonos estos fechos como una revolución comunista.

Na nueche del 4 al 5 entama la fuelga xeneral que n'Asturies toma forma d'insurreción popular. La insurreción españa n'Uviéu, Xixón y les cuenques mineres, áu la pasión revolucionaria s'esparde de pueblu a pueblu col soníu la dinamita. Los obreros échanse a la cai, les sos primeres aiciones son la toma los cuarteles de la guardia civil y los polvorines, y la ocupación de les fábriques pa poder alministrar de la manera más xusta posible lo qu'ellos mesmos producen. Na zona les cuenques, áu predominaba la UGT, el sistema adoptáu foi el comunismu autoritariu, aboliendo la propiedá privada, pero llimitando la llibertá y estableciendo una férrea disciplina. Nes zones más industriales como Xixón, La Felguera... áu predominaben los anarcosindicalistes de la CNT proclamose'l comunismu llibertariu, aboliendo la propiedá privada, la autoridá, aú ca ún yera responsable de los sos actos ensin imposiciones. Como exemplu podemos señalar qu'al facese los trabayadores cola fábrica Duro Felguera, lo primeru que-y dixeron al dueñu foi qu'a partir d'esi momentu toos yeren collacios, que nun diben facele un res, el namás tenía que trabayar y sedría tratáu como ún más.

Los gobernantes nun podíen permitir esta situación y unviaron al exércitu, pero los obreros asturianos resistieron fasta que quedaron ensin munición. De toles formes, l'exércitu republicanu, con Franco como direutor de les operaciones, solo pudo entrar cuando nun aconceyamientu de tolos comités decidiose la rendición. Anque a la so entrada n'Asturies el día 18 los obreros habíen depuesto les armes, les tropes s'ensañaron colos trabayadores y con tola población en xeneral, con muertes, tortures, ofenses y tou tipu d'humildaciones, destacando la estrema crueldá del Tercio, venío dende África.

Reclamamos la figura de toos aquellos obreros, obreros que dieron la so vida por camudar la sociedá, por dexanos un mundiu meyor, y principalmente la figura de los anarquistes, los principales escaecíos de la revolución. Nós, sobre tou la mocedá, tenemos el deber de recordar la so hestoria y continuar la so llucha pa que nun s'apague la llama llibertaria.

¡¡¡XUNÍI-VOS HERMANOS PROLETARIOS!!!

¡¡¡U.H.P.!!!

Mocedá Llibertaria d'Asturies

5 d'Ochobre de 2004